米線樂•麻辣豬骨濃湯 (已結業)

呢期見到網上瘋傳呢間米線好抵食，咁岩今晚又要去長沙灣睇跌打，所以順道可以買回家一試，果然好有驚喜！今晚呢間小店生意不俗，等外賣途中短短10分鐘已有不少人嚟買外賣，相信味道應該好有水準！分別叫咗一碗涼皮（魚腐加免治雞肉棒，小辣)，一碗酸辣豬骨濃湯米線（麻辣鴨血加黃金花枝丸，小辣），仲有兩款小食，泡椒蓮藕尖，蒜泥白肉！先講涼皮，涼皮質地滑嘟嘟，好有口感，強烈推介免治雞肉棒，啖啖雞肉之如，又夠juicy, 好味！另外一碗酸辣豬骨濃湯米線，鴨血相當有驚喜，質地夠結實，又夠入味，黃金花枝丸炸得金黃香口，唔錯唔錯！泡椒蓮藕尖，蓮藕尖出面比較少有，所以專登一試，形狀甚為可愛，口感爽脆，再加埋特製泡椒汁食，味道幾特別！蒜泥白肉，份量多，豬肉肥瘦均勻，自家製蒜泥汁夠香辣，好惹味！今晚仲叫咗佢地自家製玫瑰洛神花茶，外表相當吸引，充滿淡淡玫瑰清香，飲完可以即時解辣，「正」！