勝八鉄板串料理 (已結業)

鐵板店食得多，不過新年都開始慢慢減少，選擇亦少左，今次試呢間中價位，仲同時有埋串燒，選擇空間更多。今次試個串燒套餐，未加一４００蚊有找。沙律，醋汁有松露香，好特別。刺身，有深海池魚，三文魚，牡丹蝦，整體水平都唔錯，不過牡丹蝦唔連頭就少見啲。串燒一碟過上，感覺好似好少，但其實串串都大大串，一啲都唔少。蟹羔帶子，好甘香，帶子好大隻，燒到半熟好正。劍魚，好少見用嚟串燒，效果都幾好，唔腥，但魚油無想像中多。牛肋肉，好味，好有肉味，又唔韌，有韓風感覺。大蝦，燒得有少少乾身，蝦味都幾濃。露筍黑豚，好味，露筍好嫩，黑豚肉夠薄，包住露筍啱啱好，加埋醬燒既濃香，實在嫌少。廣島蠔，好大隻，燒到外層啱啱熟，軟滑多汁，正。蓮藕釀黑豚，呢個好特別，蓮藕夾住豚肉，爽身得嚟入面有啲肉喺度，幾得意既體驗。跟餐可以揀牛肉烏冬或炒飯，我就揀左烏冬。牛肉都唔錯，偏瘦，但有肉味之餘又唔韌。烏冬用稻庭烏冬，比較幼身，易吸湯汁，但同時亦會好快焾，要快快食先保持彈牙口感。最後甜品係薄荷朱古力雪糕，清清新新咁完結呢一餐。３８０蚊呢個餐其實都算幾抵食，串燒用上多種海鮮，其他肉類亦做法特別，值得一試。