鬼滷 (已結業)

潮州菜通常俾人感覺都係比較傳統，但係呢間餐廳感覺比較適合年輕人，菜式比較fusion新穎。蘭王蛋蠔餅$78呢個有啲似西班牙蛋餅，不過係加咗蠔仔嘅😆用咗蘭王蛋，蛋味香之餘仲有啲好似薯餅嘅感覺，炸得外面酥脆，裏面軟糯，沾上魚露，令蠔仔嘅鮮味更加突出😋蜆仔肉生菜包$88蜆仔真係好迷你，呢碟應該有成過百隻蜆仔😍鮮味十足，充滿鹹香，有少少似迷你版蠔豉嘅感覺，鮮味十足，調味仲加入少少微辣嘅菜莆，仲有炸米粉，用爽脆生菜包住一齊食正😋滷水拼盤$278我哋揀咗五款，分別係滷水鵝肉、豬肚、豬仔髀、慢煮鹽香雞、墨魚片。上枱嘅時候，店員會用蠟燭溫住，唔洗食到凍晒👍🏻其中我覺得豬仔髀最有驚喜，未食過呢個部位，一條幼骨然後啖啖肉，外型有啲似雞髀😆，滷水好入味，肉質一啲都唔乾硬，有咬口得來又唔會嚡😋另外鵝肉都好入味，沾上餐廳自己調製嘅酸醋汁好開胃😍另外薦底嘅滷水豆腐都唔可以錯過，豆腐大大件，入晒味又嫩滑。