牛扒先生 (已結業)

好少黎依度食，已經唔記得左啲出品係點，依家發現完來係咁普通既 ~ 服務又一般，未算殷勤，個個無笑容又目無表情。坐外面環境都幾寬倘，但坐室內真係好鬼迫 ﹗坐得唔舒服 ~ 蜜瓜風乾火腿，火腿咸香不足，較淡口，一般貨色。蜜瓜算清甜，可以啦，蔬菜稍為老左啲同唔夠新鮮囉。賣相同 Menu 上面張相差天共地，就算係只供參考都唔係差到無影架麻，侍應攞埋黎既時候，完全認唔出囉 ﹗干邑龍蝦湯，完全飲唔到點干邑法，味淡、厚身、唔滑、唔香，茶餐廳口味。茄汁海鮮長通粉，可能我一向唔係咁鍾意食長通粉，所以唔知點形容。覺得汁太少，未能包住整條通粉，茄汁味道還可以。通粉口感較硬，未夠腍滑，烚耐一點會好啲。雪藏海鮮算係處理得宜，未算太差。安格斯牛柳配點椒汁，要 3 成，但黎左 5 成，唔想再等，無緊要，照食。牛味夠濃、口感尚算腍滑，肉汁還有，做得唔錯。燒菜夠腍可口，黑椒汁味濃、微辣夠香。第一眼見到時，感到賣相單調，有好悶既感覺。