Gochi (已結業)

當時我同幾位朋友夜晚黎到呢間餐廳，感覺餐廳環境優雅而有格調。我地被安排坐半圓形嘅卡位座位，格外有氣氛。餐牌上最能吸引到我地嘅就係黃金海膽手工意粉所以我地不假思索地叫左，另外亦叫左一個巴馬火腿火箭菜薄餅、蟹肉番茄意大利飯、士多啤梨奶昔同咖啡、提拉米蘇甜品。我地對黃金海膽手工意粉抱有好大期望，以爲整個意粉都會滲透住濃濃海膽味。但好可惜，除左頂頂擺左嘅個一舊海膽外，整個意粉都係無海膽味。金黃色醬汁只係蛋黃做（甚至唔係鹹蛋味），因此都頗失望。而巴馬火腿火箭菜薄餅本身味道OK，但落嘅火箭菜實在係太多！就算整走左好多都食得出d菜係非常苦澀，所以呢道菜建議一定要整走大量火箭菜（可能留一條好了😂）。雖然以上2道菜有點失望，但我地不抱有期望嘅蟹肉番茄意大利飯竟然有驚喜！呢個意大利飯個汁非常香濃！直頭有龍蝦汁味嘅感覺！齋望著個名，係絕對唔會聯想到呢個味道，所以非常推介！最後，士多啤梨奶昔係好甜嘅味道，朋友覺得有點藥水味。而我就覺得無乜問題因為我好喜歡甜野，所以就隨大家喜好決定點唔點啦。而提拉米蘇甜品同咖啡都係正正常常不過不失啦。總結，要黎就一定要食蟹肉番茄意大利飯！其他就自己考慮啦！