醬堡 (已結業)

今日同朋友行開大角咀，行行下見有點肚餓，於是就入左一間食burger既小店喇。雖然空間真係比較細，但係裝修都幾簡約而不浮誇，門口仲有一個舊式郵箱幾特別添！睇睇餐牌見到burger既選擇都幾多，而且小食種類亦都幾多，任君選擇！係餐牌見到有個叫川式麻辣醬堡，朋友中意食辣所以佢梗係要試試有幾辣啦。老闆仲特別同我地講辣度大概係譚仔既三小辣，三小辣對佢黎講完全冇難度啦！朋友話呢個麻辣burger真係拍得住譚仔既三小辣喎！酥麻既感覺一直都keep係口入面久久不散，而且同牛肉都好夾，牛肉既肉質亦都唔鬆散，咬落去好有質感，唔錯！而我呢個就係bbq醬和牛堡，醬料方面都幾足料，而且中間仲有半溶既車打芝士，加埋一塊juicy到爆既和牛漢堡，新鮮既生菜作配襯，成個burger簡直係滋味無窮啊！隨burger附上既小食有沙律同埋一份水果盒。Burger配埋沙律就可以減走油膩感，咁就唔怕肥啦。另外水果盒有香橙同哈蜜瓜，兩樣水果都好甜又多汁，成件事都好refresh！飲品方面有菠蘿汁同冷泡咖啡。特別想講講冷泡咖啡係標榜自家釀既，飲落雖然比較清啖，但係能夠中和返burger既濃味，而且係炎炎夏日都算係解渴既良品黎！