康瑞涼茶 (已搬遷) 新店位置

康瑞涼茶雖然叫涼茶，除左賣涼茶之外，仲有糖水賣，最有趣既係原來佢仲係中醫館黎~想食呢度既糖水就要4點之後先黎，因為4點先開始賣~ 仙草百配就咁睇已經好吸引，望落去好似長頸鹿花紋咁靚，色彩十足。食既時候最好拎住黎食，唔好懶，唔係有排先食哂，啲仙草太滑身，成日都跣番落碗到😂仙草有住一股清幽既草藥味，食完之後透心涼之餘又可以去去濕毒，夏天健康好選擇。紅豆大大粒，冇煮爛但又夠軟身😍西米晶瑩剔透，薏米令糖水更有口感，而芋圓，小丸子，地瓜圓有意想不到既驚喜，煙韌不在話下，地瓜圓同芋圓竟然食到絲絲既地瓜肉，果然真材實料👍仲有呢度糖水唔會好甜，清清地，好岩大人細路食，可能因為呢度係中醫館關係，所以照顧哂所有食客需要，以健康為先食到最有益既甜品。就咁睇呢粒糖不甩平平無奇，以為只係普通無餡糖不甩，一咬之下原來裡面有花生糊，糯米皮鬆軟滑溜，花生餡更加係絲滑甜香，沾滿花生芝麻碎香口無比。