人和月雞煲火鍋店 (已結業)

見幾個friend都係ig story讚依間雞煲火鍋正, 上網睇下原來新開無耐, 除左雞煲之外仲有酸菜魚同韓式芝士雞, 另外多款火鍋料120分鐘任食, 好似幾吸引。$298餐都有5款牛, 兩款豬同埋海鮮等任食, 就揀佢試試。先黎個酸菜魚, 湯底夠香濃夠酸, 內有好多酸菜,仲有入左味既寬粉, 魚肉無骨啖啖肉而且都好滑, 份量仲唔少添!依度既鍋湯底有6款, 揀左個比較特別既藥膳養生牛奶湯, 味道香又唔會過於剌激同油膩。餐廳已經準備好第一round既牛, 有齊5款比你試勻哂先再encore牛肉望落去好靚仔, 其中既牛下肩牛味突出, 雪花肥牛油花滿滿肉質腍, 最特別係依度有牛胸爽任食, 牛胸爽又香又爽脆, encore之選! 依度既海鮮亦不錯, 特別推介海蝦, 夠新鮮, 肉質結實帶鮮甜, 至於墨魚滑同蝦滑都足料彈牙。外面既自助bar仲有好多唔同既火鍋料, 全部有蓋蓋好乾淨企理。最特別係比我發現到有魚肚! 仲係超大塊厚身既魚肚, 吸湯一流, 必食呀!餐廳都有自家製既泡茶, 仲有甜品區, 有豆腐花同芋圓等等, 臨走前食左碗豆腐花, 好滑! 值得一試!