Cocolo Tokyo Cake Factory (利東街) (已結業)

曾經喺西貢食過呢個蘋果批，都幾念念不忘，最近發現原來佢喺灣仔利東街下面嘅商場開咗分店，今日去到灣仔食飯，都不忘要買返一件過吓口癮。青森蘋果批係由日本直送，運到香港店內再新鮮焗製，所以咁高質！日本直送嘅清心蘋果批$33/個，買四個仲有優惠添！店內仲有一個好貼心嘅服務，就係有一個位置比客人免費充電，客人可以一邊飲杯咖啡、食個蘋果批，幫自己叉叉電之餘亦都幫自己嘅手機充充電。其實呢度唔止有蘋果批一種選擇，仲有好多唔同嘅蛋糕甜品。除咗甜品以外，仲有一系列嘅咖啡出售。咖啡機都好專業，而且仲有好多唔同嘅用具比客人自由取用。雖然$33/個蘋果批聽落有少少貴，但係佢嘅size都好大，而且包裝亦好精美，當然食完之後你就會覺得真係物超所值。攞到返屋企已經唔係最新鮮嘅狀態，但酥皮仍然十分鬆脆，層次分明，蘋果蓉非常清甜，仲有粒粒嘅蘋果肉，配合吉士醬，真係無得彈！另外仲買咗個日式蒙布朗，有北海道南瓜、三重芝士、同埋日本甜王士多啤梨可供選擇，而我就揀咗南瓜味。呢個蒙布朗面層係南瓜蓉，中間一層係忌廉，底部就係海綿蛋糕，入口有唔同層次，味道亦不錯。呢個青森蘋果批真係好好味，下次我要買夠兩打請埋同事食先得！