輝煌樓海鮮酒家 (已結業)

之前同屋企人飲過早茶，見到晚餐menu都幾平，所以今次同朋友黎呢度食晚飯。呢度裝修得唔錯，金碧輝煌，燈火通明。晚飯小菜都幾多選擇，而且價錢都算平，本來想叫二人套餐，套餐包括清煮沙巴加兩款小菜，都只係$288，不過朋友驚食唔曬，所以叫左三個小菜加白飯。送嘅老火湯，非常清潤又足料，咁啱果日係大暑，飲冬瓜湯最啱！上湯翡翠苗，菜苗都幾嫩，金菇都幾多，上湯煮幾青甜，唔會好似炒菜咁油膩。黑醋咕嚕肉，咕嚕肉味道唔錯，黑醋醃製嘅咕嚕肉加菠蘿，青、紅椒伴碟，酸甜味好醒胃。紅燒乳鴿，睇見都流口水，不嬲鍾意食乳鴿，隻乳大隻又多肉，幾肥美，火喉燒得啱啱好，外皮酥脆，內裡肉嫩。紅豆沙糖水係送嘅，紅豆沙煲到起沙，加左陳皮、蓮子，味道唔會過甜。水晶包都係送嘅，水晶包幾得意，細細隻，做飯後甜品啱哂，豆蓉餡，亦都唔會太甜，幾好食。侍應服務都周到，主動幫忙加茶，又提我地有糖水、甜品送，環境、食物、服務都唔錯嘅酒樓。