壹壹漁一 (已結業)

喺星期日嘅下午，同朋友兩個撐枱腳。我哋搵咗酒店餐廳入面食自助餐，諗住過個休閒嘅星期日。呢間餐廳係食泰式自助餐。自助餐食得多喇，泰式嘅比較少，有啲特別。首先一嚟食沙律。沙律吧嘅款式都幾多，另外仲有魚生。魚生有蝦同埋三文魚等，魚生色澤都幾光鮮，食落都算新鮮。各款沙律入面最鍾意食火腿粉絲沙律，涼浸浸幾開胃。餐廳有一盤泰式小食，有係蝦餅、春捲同埋蝦片。比較鍾意食春捲同蝦片，脆卜卜，有泰式風味。推薦海南雞，可以揀配飯。不過食海南雞吸引啲，海南雞肉質唔算煙韌，食落都幾入味。另外推介豬頸肉，豬頸肉薄身一片，加埋泰式酸辣醬就係唔錯嘅配搭。餐廳另外仲有兩款湯，分別係冬瓜湯同埋冬陰公湯。兩款都試齊曬。冬瓜湯都幾清涼，至於冬陰功湯，冇想像中咁辣，味道還可以。另一邊有粉麵類。不過由於已經食飽嘅關係，未有機會試。整體覺得食得都幾舒服，就算坐得耐都冇職員趕走，同埋環境都幾寧靜，適合傾計。如果第時黎開大角咀，都有機會再嚟。