和順記 (路德圍) (已結業)

今日去荃灣路德圍搵嘢食，見到一張超大隻炸雞髀嘅poster，睇真啲原來係大名頂頂嘅「和順記雞髀王」，再聞到一陣香濃嘅油香味，好自然被吸引咗去食。自助落單鹹蛋黃炸雞脾套餐今日真係豁出去，點咗餐牌裏面最邪惡嘅鹹蛋黃炸雞髀。一嚟到真係嘩咗一聲，隻雞髀大過手掌，一咬落去外皮脆卜卜，味道好似食緊鹹蛋黃魚皮，雞肉醃得好入味，肉質嫩滑，肉汁豐富，加埋一隻脆邊煎蛋和香甜嘅瑞士汁，真係招牌菜冇得輸。豆豉蒸龍躉套餐為咗平衡返，叫咗個善良嘅龍躉套餐，大大嚿龍躉球，肉質鮮味，魚皮嘅骨膠原豐富，最欣賞過豉油汁，加入豆、蔥粒、姜絲，用嚟撈飯和撈麵都啱晒。脆炸雞軟骨份量都幾多，外層炸得鬆脆，雞軟骨夠爽口，一咬落去滲出雞油香味，真係食唔停口。