影片
更多
2020-03-31
187 瀏覽
呀媽最鐘意食海鮮，所以呢日我就帶咗佢去阿爺八鮮鍋試下，皆因同事高度推介，佢前排成家大細食完全部人都話好正，海鮮好新鮮👍。我就預先Book定枱，五點就嚟食，可以食平啲個時段，反正星期六嘛！加上而家堂食用現金比錢有八折優惠，好抵呀！我哋係登打士街離遠已經望到個燈牌，行到樓下見到條樓梯就上咗，行咗三層😅，但上到去發現係後門...。其實頭先喺樓下行前多10米，就已經可以行入大廈搭𨋢，我相信無乜人好似我哋咁蠢🙈。一坐低店員姐姐就走埋嚟問我哋有無食過，同我哋介紹下呢到有乜食同收費等。無幾耐疑似老闆嘅人走埋嚟比骰盎魚蝦蟹我哋玩，原來中三粒同款有嘢送😍，後面枱中咗三個銅錢，可減$200，勁好運！我哋就無咁好彩了...。是日精選燉湯係老雞赤肉燉花膠魚翅，聽個名就知好滋補，燉湯用料上盛，魚翅大大片。我無諗過隨打邊爐奉上嘅湯都咁足料，真心有少少受寵若驚，哈哈😝。是日廚師推介係瀨尿蝦，可以揀清蒸或者避風塘，咁就梗係後者啦，惹味啲嘛。瀨尿蝦每人有兩隻，每隻都成個碟咁長，勁大隻呀👍。時令刺身拼盤有三文魚、油甘魚、赤蝦、中華沙律同象拔蚌刺身。味道不比日本餐廳遜色，主要係因為食材本身夠新鮮嘛。象拔蚌刺身比較少食，口感
呀媽最鐘意食海鮮，所以呢日我就帶咗佢去阿爺八鮮鍋試下，皆因同事高度推介，佢前排成家大細食完全部人都話好正，海鮮好新鮮👍。我就預先Book定枱，五點就嚟食，可以食平啲個時段，反正星期六嘛！加上而家堂食用現金比錢有八折優惠，好抵呀！
我哋係登打士街離遠已經望到個燈牌，行到樓下見到條樓梯就上咗，行咗三層😅，但上到去發現係後門...。其實頭先喺樓下行前多10米，就已經可以行入大廈搭𨋢，我相信無乜人好似我哋咁蠢🙈。
一坐低店員姐姐就走埋嚟問我哋有無食過，同我哋介紹下呢到有乜食同收費等。
無幾耐疑似老闆嘅人走埋嚟比骰盎魚蝦蟹我哋玩，原來中三粒同款有嘢送😍，後面枱中咗三個銅錢，可減$200，勁好運！我哋就無咁好彩了...。
是日精選燉湯係老雞赤肉燉花膠魚翅，聽個名就知好滋補，燉湯用料上盛，魚翅大大片。我無諗過隨打邊爐奉上嘅湯都咁足料，真心有少少受寵若驚，哈哈😝。
是日廚師推介係瀨尿蝦，可以揀清蒸或者避風塘，咁就梗係後者啦，惹味啲嘛。瀨尿蝦每人有兩隻，每隻都成個碟咁長，勁大隻呀👍。
時令刺身拼盤有三文魚、油甘魚、赤蝦、中華沙律同象拔蚌刺身。味道不比日本餐廳遜色，主要係因為食材本身夠新鮮嘛。象拔蚌刺身比較少食，口感原來係咁爽口😀。
原味花膠雞煲，今時今日打邊爐前有得食埋雞煲，唔算係乜新奇事，但🐔雞煲入面加埋花膠又令成件事唔同。花膠多到一個點，幾乎仲多過雞，好誇張！原味雞煲其實都幾正，呀媽連啲蔥都食哂，但小辣應該會更不得了。
食咗咁耐，終於輪到打邊爐喇🍲，其實已經有啲啲飽，但好彩跟住落嚟嘅都係海鮮，唔會太Heavy！打響頭炮嘅係海鮮超級盒，有龍蝦、鮑魚、扇貝、三點蟹同海蝦。未食已經知道好新鮮，因為全部都仲識郁或者係啱啱劏㗎！當然進食後，我哋發現每樣海鮮都真係好鮮甜🤤，理想同現實一樣。
基本上除咗龍蝦外，其他海鮮全部都有得添加，當中鮑魚、蟶子、蜆等通通都有😳。只可惜肚皮有限，兩個人真係試唔哂咁多種。另外，餐牌亦有超過20款其他火鍋配料可以任嗌。抵讚嘅位係每次上料嘅份量都剛剛好，唔會嚟太多，搞到食剩做成浪費。反正任食，唔夠食咪再點囉！
第一輪我哋要咗安格斯牛肉、手打蟹籽蝦丸、手打黑松露墨魚丸、潮州牛筋丸、甜粟米同炸魚皮。🐂牛肉有五小片，一個人食啱啱好，肉味都OK。蝦丸超彈牙，有原隻蝦肉，勁正；但粒墨魚丸反而就唔夠彈，我哋懷疑係比錯咗鯪魚球。魚皮亦唔夠脆，扣咗少少分；好彩牛丸同粟米🌽正常。
第二輪我哋要咗黑豚肉、萵筍、生蠔、蟶子同海蝦。🐖黑豚肉有兩大片，同牛肉細細塊唔同，都幾好食，無臭豬味。萵筍唔使講，係我至愛。生蠔我無食，蟶子就超新鮮，仲係郁下郁下，不過Size唔係大隻嗰種。🦐海蝦就係因為一開始食完海鮮拼盤嗰隻覺得好正，所以追加，今次嚟到亦都無令我失望，蝦肉比平日爽口。
餐廳嘅飲品係加$20任飲，打邊爐唔係唔加啊！枝裝嘅蜂蜜雪梨同竹蔗馬蹄都唔錯，唔太甜😉。最後，食埋甜品仔就滿足哂，甜品仔有四款，全部都係一口Size，似平日日式放題食到嗰種。四款包括歌劇院蛋糕、黑森林蛋糕、芝士凍餅同栗子慕絲蛋糕。
食物以外，餐廳環境同店員服務都幾好，佢哋不停幫我哋換碟，禮貌又唔錯。環境雖然無好華麗嘅裝修，但都算闊落同乾淨企理。餐廳仲有好多個魚缸裝住好生猛嘅海鮮🦀。
總括嚟講，呢餐海鮮宴嘅海鮮新鮮度係滿分💯，全部食過嘅種類，無一樣令人失望。埋單計埋折扣每人都係三百頭，超值，因為講真自己買海鮮都唔平啦，街市買龍蝦百幾蚊都未必有一隻，而且一次過又買唔到咁多款。呀媽話下次再嚟食過，同埋呀爸呀哥食咁話喎～。我喺到諗如果個湯底可以煮埋粥就一流，一定好鮮味😋。
張貼
