泰妹餐廳 (置富嘉湖) (已結業)

天水圍難得一見嘅高質泰國餐廳！同朋友搵緊晚餐嘅時候，俾門面充滿濃濃泰國色彩嘅招牌而吸引。餐廳環境非常整潔，牆上嘅方塊畫作亦都令人賞心悅目。我地以冬陰海鮮湯(細，$88)作為開首。湯底十分濃郁，用嘅都係泰國地道嘅材料黎熬製，味道酸酸地，唔係特別辣，非常開胃。配料有猛料嘅海鮮，包括原隻大頭蝦、青口、鮮魷、蟹柳等等，估唔到餐廳竟然會選用新鮮嘅大蝦，非常有良心！泰式燒烤拼盤($108)，有豬、牛、雞，每款2串。串燒燒得焦焦地，非常惹味，而且肉質軟腍，唔會過硬得黎仲保番住佢嘅口感，仲可以點埋沙嗲醬一齊食~班蘭葉包雞($48)，我淨係食過荷葉包雞，所以叫咗班蘭葉包雞試一試。賣相一樣都係呈三角形，雞肉紮起後更加有口感，煎香後仲脆脆地，仲有陣陣香葉嘅味道。壓軸登場嘅係臭翁草煎蛋($68)，黎之前冇聽過臭翁草依個名，一直諗會係點嘅味道。同蛋一齊煎後有種淡淡嘅香草味，估唔到又幾香口。總括黎講，依度嘅泰國菜都花咗唔少創意落去，而且價錢合理，值得一試！