韓牛韓式燒烤 (已結業)

呢日嚟到創興廣場一樓嘅韓牛食韓燒放題。餐廳面積都幾大，裝修略帶韓國風格，座位闊落，坐得舒服。攞食物嘅地方成“L”型咁設喺餐廳其中一角，一part part咁分門别類，夠晒清晰。韓燒肉類有十幾二十款，大部份都已經調好味，其中嘅羊肉、牛脷、肥牛同五花腩，肉味濃郁，調味得宜，口感唔錯。仲有好多新鮮菇類同瓜菜類，任君選擇。另一個位置係泡菜區，泡菜連煮好嘅蔬菜加埋有十幾款，泡菜最適合配啱啱燒好嘅肉一齊食。熱食區有韓式海鮮煎餅、蔥餅、泡菜 餅、韓式雞翼、春卷……等等，各適其式。當然唔少得好多人都鍾意嘅壽司同埋 海鮮啦，食咗蟹柳壽司同八爪魚壽司都新鮮甜美。食到滯滯地仲可以自製返一盤沙律refresh 一下。除咗好多款啤酒同汽水 任飲之外仲有水蜜桃汁同豆漿可以揀。最後當然唔少得老婆至愛嘅甜品、軟雪糕同埋朱古力噴泉啦原味軟雪糕加上香甜嘅士多啤梨醬及七彩繽紛嘅朱古力同脆脆，好睇又好食。桂花糕清甜爽滑，芒果布甸芒果味濃，椰汁西米糕亦係個唔錯嘅選擇。食埋甜品，呢餐食得十分滿足！