泰式食

營業中

休息中

不時經過銅鑼灣金百利廣場，知道樓上有好多餐廳，但親身去食都係第一次，朋友想食泰國菜，於是去左泰式食。餐廳好大間，一入到去就見到成架篤篤放左係度，即刻以為自己去左泰國。每張餐枱之間都有充足距離，唔會密密麻麻，除非你用大聲公啦，唔係ge話同朋友傾計都唔驚比隔離枱聽到，好適合又食又傾。小食、串燒、海鮮、粉麵飯、特飲等泰國菜常見菜式都有，我同朋友做完運動又餓又攰，於是叫兩碟粉麵飯同生菜包，快手食完返歸訓覺，留返下次先慢慢飲埋野傾計。帶子應該係刺身級，煎到半熟，一d都唔韌，如果表面再煎香少少就仲正。辣椒膏同飯炒埋一碟，但唔會濕，飯依然乾身，粒粒分明，我同朋友都嗜辣，我地食左第一啖飯之後，異口同聲都話夠晒辣，正！牛肉厚薄適中，唔似落左鬆肉粉，食落無潺無渣，值得一讚ge係用左粗河粉，炒河用粗，湯河用幼，坊間好多餐廳不論炒定湯都一律用幼河，手勢無咁好就會炒到斷晒。醃肉碎用左一種好特別ge香草，同平時食開有分別，可惜我食唔出到底係咩香草。生菜新鮮爽口，肉碎份量多，唔會菜多過肉無野包咁尷尬。