鱻潮手工私房鍋 (已結業)

星期六約班朋友去行獅子山，落山近沙田圍。行完山最啱係大排檔食啲小炒飲杯啤酒。我地search附近最近係呢間，就過去，嚟到發覺唔係傳統嘅大排檔，但都有大排檔嘅feel，有多款小炒。我地簡單點咗幾個餸，椒鹽系列當然不可少，用嚟配啤酒一流！點咗個椒鹽墨魚咀，都幾特別下。荷香籠仔蒸蟹飯：飯粒鬆軟，吸收咗蟹嘅鮮甜，亦都有些少荷香味，一人可以分到一小碗都夠食。辣子雞：呢個係我最愛，香辣惹味，又唔會整到太辣。仲有豉椒炒花甲，腐乳通菜，味道都幾好！果然食小炒當然要去大排檔啦。坐得舒服又無限時，慢慢飲番杯啤酒。自從屯馬線開通之後交通方便咗好多，我地搭去大圍都只係兩個站。