海港燒鵝海鮮酒家 (已結業)

好耐無同屋企人飲茶喇，今日放假轉登落大埔聚聚，順路睇下聽晚屋企打邊爐有什麼可以買定先。Lunch 不太肚餓，一家四口飲茶，食少少夠。咕嚕黑豚肉、棉花雞、椒鹽狗肚魚、豉汁排骨、蟹籽燒賣、鮮蝦炒米粉、菜乾排骨粥、鮑汁鳳爪，飽飽。人山人海，檯椅放到密密麻麻，環境嘈喧巴閉勁炒耳，嘈音不停來襲，非常影響情緒及食慾呢。鮮蝦炒米粉，炒得太乾呢，乾到我連阿媽都哽到啊 ﹗一定要小心地趙多幾下先吞。味道清清淡淡，蝦又幾爽口，米粉無發脹，合格既。不過我由細到大都不喜歡米粉的，尤其粗身米粉或米線，不過幼身如福字即食湯米粉或是阿媽炒既雞蛋腿絲夏門米粉都好鍾意食呢。咕嚕黑豚肉，高質高質，開心晒 ﹗真係炒得好有水準，由賣相、配搭、氣味、鑊氣、口感、味道都十分滿意，無投訴。黑豚肉熱燙燙，棉中有趙口，香濃豬肉味滲著甜美豐富肉汁，加上酸酸甜甜又不嗆不濁咕嚕汁就更醒神開胃，好好味 ﹗加埋彩椒另色彩更繽紛，錦上添花，外觀吸引力爆燈 ﹗鮑汁鳳爪，有驚喜 ﹗海港用橙色炸爪炆，特別索汁喎 ﹗味濃出眾，皮香肉嫩而帶黏，香而不過咸，達標過關。菜乾排骨粥，其實諗住叫碗粥襯托返個炒米粉之麻。睇落就好多料，奇怪地粥底完全無味架喎，白粥一樣。