魚鮮生刺身專門店 (已結業)

離開香港咁耐 第一樣返到黎最掛住既野一定係日本菜！一落機已經好夜 大部分餐廳平日都唔會開到太夜，但好彩呢間魚鮮生開到零晨12點！入到黎人唔係太多，周圍都係充滿日系裝潢。我地兩個人嗌左兩份魚生飯，一份係三文魚腩飯，另一份係三文魚海膽飯。職員好快就落左單，之後就送左一人一份沙律同麵豉湯。沙律好開胃，沙律醬份量啱啱好，食完唔會太濟，而麵鼓湯都唔會太熱，主菜黎之前飲啱啱好！主菜黎喇！食完沙律同飲完麵豉湯啱啱好！海膽三文魚飯好足料！海膽係整整兩份，食落好新鮮，無雪過既味道。雖然三文魚唔係一塊塊，切左粒，但份量都好多，唔會食到最後得返飯。而且有樣野好貼心既係碗旁邊有四至五塊紫菜，向來唔食鼓油既我可以用紫菜海膽同三文魚粒包飯，咁就唔太寡喇！另外一碗係三文魚腩飯！呢個三文魚腩飯都係有送紫菜，但因為佢唔係切粒，係好似刺身咁上，食到最後飯太多，搞到最後得返白飯有啲寡，但三文魚腩既味道都唔錯，脂肪味都幾重。最後食完之後飲返杯暖既茶，好滿足的一天！總結，今次兩款飯都唔錯，但海膽三文飯更優勝。而價錢方面兩款都合理，三文魚飯唔需要一百蚊，仲送沙律同麵鼓湯，份量夠大，男仔唔洗驚食唔飽！