來多碗車仔麵 (康寧道) (已搬遷) 新店位置

好耐無食過車仔麵，上次經過呢條街見佢新開張已經想食下，今晚咁啱又過黎呢頭，就食佢啦。店內很光猛乾淨，新開張咩都白雪雪。有數枱客人，似乎都係街坊熟客，同店員有傾有講，幾warm咁。自己點餐比錢再埋位慢慢食，第一次黎睇下餐牌有咩揀先，麵同餸都有幾多得揀，諗左陣決定叫呢幾樣先。朋友碗河粉，全部揀肉……食肉獸話正喎，揀左午餐肉(有兩片)，漢堡扒(一塊)，魚片餃(兩隻)同牛腩，四餸一麵勁豐富。自己個碗，兩肉兩蔬同米粉，大大碗，滿滿的，加埋腩汁同辣醬，車仔麵嘅精髓嘛，正！冬菇，炆得軟腍厚肉，爽口。豬紅，入味唔散亦唔過硬。豬腸，肥美有咬口，正。仲揀左蘿蔔，大大塊，同樣炆得又淋又入味，無渣，好食。米粉較為碎啲，都ok啦。加七蚊要左罐汽水，屋企樓下部汽水機都要八蚊，呢度算係咁啦。散叫一款餸要八至十蚊不等，咁樣叫會抵啲。