SOFFEE (T.O.P This is Our Place) (已結業)

舊朋友敘舊，通常都會揀旺角，方便大家去同散水，今日就選址位於T.O.P嘅Soffee。去得Cafe當然要叫返兩杯飲品。芋圓芝士奶蓋茶呢個配搭比較新穎，而芝士奶蓋配芋圓味道又幾夾，而且除咗有奶茶嘅香味，仲有花香襯托住。芋泥芋圓奶茶仲可以選擇茶底，烏龍茶味嘅奶茶滲透出啖啖嘅茶香，芋圓煙靭有口感。因為想食甜品，所以就揀咗比較light嘅和風軟殼蟹沙律，酸酸嘅和風沙律醬汁配合新鮮嘅沙律菜令人開胃，軟殼蟹感覺亦都唔太油膩。乾蔥香炒蟹膏蟹肉意大利麵其實係一道幾香口嘅菜式，由於冇太多醬汁，食落乾身更能突顯一絲絲嘅蟹肉。最後嘅甜品揀咗香蕉朱古力榛子醬窩夫，窩夫嘅口感，有啲似牛角酥，配上香濃嘅朱古力榛子醬，而佢嘅香蕉之上仲有焦糖脆面，真係一道豐富嘅甜品。