巴西燒烤餐廳 (已結業)

以前去過維園泳池旁嘅巴西燒烤，貪佢有露天位，景觀開揚。今次揀尖沙咀尖東廣場，皆因有親友生日，就番大家，而且，大家對食無乜太高要求，諗住平平哋就揀巴西燒烤！晚市buffet，百鬆Ｄ蚊，叫做樣樣食物都有，有中西湯、沙律、壽司、魚生、冷盤、熱盤、炒粉飯麵、糖水、甜品，多款燒烤扒纇及蔬果，算係咁啦。唔好期望Ｄ食物質素好好，但有Ｄ都唔差，仲唔錯添！Ｄ燒烤扒纇及蔬果都唔錯，尤其烤菠蘿、雞脾菇、豬仔骨同粟米腸，Ｄ扒都ＯＫ啦，但無乜驚喜。沙律就一般般，沙律吧Ｄ沙律菜麻麻地新鮮，反而食預製嘅沙律仲好。壽司、魚生、冷盤都係麻麻地，只係人有佢又有咁，可以唔食。熱盤、炒粉飯麵都有幾款幾好，例如焗蠔、咖喱魚柳、炒伊麵同荷葉飯。糖水、甜品雖然好多選擇，擺滿咗係正中間張buffet枱度，但質素就好街坊，同酒店級就差一大截，叫做好Ｄ嘅有美國芝士餅同藍梅慕絲蛋糕。因有親友生日，搵咗佢個結他手哩伴奏唱生日歌，今次又幾好喎，又唱英文，又唱中文，搞得個氣氛唔錯。衰就衰在限時食兩個鐘，雖然食咗兩個鐘，佢都無趕我哋走，不過，見外面門口有人等，我哋又食飽晒，都係坐多一陣！