金裝燉奶佬餐廳 (大圍道) (已結業)

講到糖水甜品，燉奶佬的確幾出名，口碑亦唔差，不過今日猴子唔係嚟食甜品，只係路過想食個平平哋嘅下午茶餐，所以叫咗碗越式香茅豬扒米線。係人都知糖水一定要夠火喉，紅豆沙要煲到起沙先好味。或者燉奶佬實在喺糖水界太成功，所以不知不覺咁將佢哋嘅功夫帶到落下午茶餐之上。呢碗越式香茅豬扒米線，無論係豬扒定係米線都煮到好腍，完全唔需要用力咬，入口即溶。如果只講味道，其實係OK嘅，只係欠缺口感，不過猴子覺得煮得腍都唔一定係壞事，起碼適合老人家食。最後值得一讚嘅係佢哋嘅樓上雅座，乾淨企理又光猛，仲可以望吓街景，十分舒服寫意。