阿四車仔麵 (已結業)

早幾個月之前去過粉嶺幫襯過呢間阿四車仔麵， 覺得個服務質素都非常之有水準。 今日經過旺角，見到佢嘅分店， 旺角分店嘅裝修比粉嶺更加精緻美觀，就決定再次幫襯。同朋友兩個人點左兩個車仔麵+3個小食，非常之飽， 非常之滿足。我自己就點左招牌面，招牌面有九個餸； 魚蛋、魷魚、豬皮、滷大腸、雞翼尖、蘿蔔、滷水蛋、瑞士雞翼、豬紅。 每個餸都有幾舊， 目測好似每樣幾舊仔， 但食晒會好夠飽。 - 魚蛋好彈牙， 偏大粒， 小小咖喱味，唔錯！- 雞翼尖滷水汁老得好入味，「妹一妹」就將隻雞翼尖食得乾乾淨淨- 瑞士雞翼都同雞翼尖一樣好入味，大大隻！除咗車仔麵嘅餸之外，我哋仲嗌咗小食，有炸燒賣，炸豆腐，同埋炸墨魚卷。出面食過炸燒賣都好多次，但呢間車仔麵炸嘅燒賣唔會好乾身，非常之好食！唯一覺得麻麻哋嘅就係個「麻辣醬」唔夠辣亦唔夠麻， 最鍾意食辣嘅朋友可能會有少少失望！整體來講，通常食呢啲車仔麵，餐廳嘅環境亦都比較普通，相比之下呢間餐廳無論裝修，食物質素，服務態度屬於高水準之作，真心推介！