木金餃子製作所 (已結業)

我好鍾意食餃子，但出面啲餃子好多時皮厚餡少，食落去嘅口感完全唔得。專登嚟試吓呢間餃子專門店，睇吓好唔好食！呢間餃子店喺觀塘駱駝漆入邊，都幾容易搵，門口有大大個招牌，不過駱駝漆嘅lift就有啲難等…店內環境用木質嘅枱櫈，感覺屬於日式簡約風格。至於餐具都好特別，用咗金屬拼木質手柄嘅設計，睇得出小店好有心思。餃子有好多種口味，同時可以單點或者雙拼，唔夠飽嘅仲可以加烏冬底。餃子好大隻，皮薄爆餡，每一隻餃子都係脹卜卜、好厚實，一口咬落去係大大嘅滿足感！湯底可以揀南瓜湯或者豬骨濃湯，我就揀咗南瓜湯，湯嘅濃稠度屬於比較杰身，比較飽肚。一set有八粒餃子，飲埋南瓜湯，真係好飽！如果下次再去，我應該會叫豬骨濃湯做湯底。