喺時代廣場嘅出口行過去大概5分鐘左右，行上一層樓梯就見到門口啦！
一入到餐廳，以為自己去咗6、70年代香港既片場
成間鋪裝修都好懷舊
紅色同綠色嘅霓虹燈、理髮店招牌等等嘅元素集合埋一齊，見到都覺得開心
座位非常闊落，好好坐
呢度嘅餸都幾多選擇，仲有活海鮮套餐
幾百蚊就有，係抵食既
店員服務超好，即時用滾水幫你洗哂所有碗筷
自助調味料
我哋三個女仔，叫左個美人鍋
超多養顏材料，紅棗、花膠、陶膠、金華火腿同埋新鮮雞等等。
店員亦都幫我哋立即切好隻雞
叫左個小食 「蝦多士」
多士炸得好鬆脆
打邊爐又點少得牛呢～叫左唔係度度都有既封門柳
厚切既，好新鮮
仲叫左珊瑚蚌、稻庭烏冬、新竹米粉、即炸響鈴、手打蝦芝士丸、田園拼盤
鯇魚超級新鮮、厚切
非常爽口，有咬口
最後仲送甜品🍮
黃色透明膠兜，啫喱上面有煉奶，再加一把遮仔，絕對係經典香港舊式甜品嘅造型！
跟住嚟咗一碟鯉魚仔，話係糖不甩
魚仔要擺落窩裏面淥熟，大約2分鐘。店員幫我地整，之後拎上嚟再切件，沾滿花生粒。再放碟上就完成啦
糖不甩係甜嘅，但經火鍋碌過，帶點鹹味，同出面食嘅糖不甩唔同，味道有層次好多
香港已經好少見咁有質素嘅餐廳🍴
服務非常好，食物質素都好高
埋單每人都係4百蚊左右，性價比超高
