青森二丁目 (已結業)

中學同學聚舊，簡左上水嘅青森二丁目，水準同一年前保持到。今次叫左成10樣野都有，同大家介紹下比較抵食同特別嘅野啦。三文魚壽司係最令人深刻。每一件嘅三文魚都唔會孤寒，長到可以卷住黎食，而且都非常新鮮，厚度適中，絕對係不二之選。另外，牛油帶子都好食。用鐵板燒送上熱騰騰嘅帶子，一碟都有成6粒，而且粒粒都幾大，唔係你係放題食果啲的骰帶子。帶子非常入味，但你就預左唔會食到鮮味。燒汁魷魚都要比個like，魷魚煮得唔韌唔老係最重要要素。而且魷魚size都唔細，我地5個人每人都分到幾舊。燒汁好入味，唔會過咸拿捏得好好。炸年糕都可取，唔會濟，令到人仲想食下一舊嘅意慾，唔係間間都可以做到。炸粉唔多，幾香口，略嫌一碟分量較少。其他黎講蟹子沙律好大碗，雖然味道同出面分別唔大，但蟹子數量都頗多，食到成嘴都係。芝士焗蠔飯，芝士扇貝同炸多春魚就稍為遜色，平平庸庸。整體黎講青森真係聚餐嘅一個好選擇，呢個價錢黎講算係中上嘅食物素質。