Lilium

講真呢間餐廳嘅食物質素真係冇乜問題, 我每次都會叫滷肉飯, 熱咖啡, 所以可以肯定佢嘅食物質素係保持到的.

因為時間就唔啱, 應該最少有幾個月冇幫襯喇, 今日終於有時間, 特登由灣仔落到嚟鰂魚涌, 講真呢一區都有其他餐廳不過我就都掛住佢個滷肉飯, 所以完全唔考慮食其他餐廳, 點知真係畀佢個服務激氣到我好有機會以後唔會再幫襯！！！

我到餐廳嘅時候大約兩點半, 餐廳大概八成滿座, 但係仲有吉枱的. 仲有一張大枱, 好似係坐到六至八個人, 放滿曬“留座”嘅牌響枱面.

我入到去我話一位, 收銀機有個阿姐指我去一張, 已經坐咗三個人嘅枱同人搭枱. 由於我都幫襯咗好多次所以熟悉佢啲座位係點, 我望到一張四人吉枱, 我就冇出聲自己行去坐, QR code落單, 本來都相安無事...滷肉飯嚟咗, 咖啡嚟咗, 咁我就開始進食啦.

過咗五分鐘, 我仍然專心食緊我嘅late lunch, 突然聽到拍枱聲, 嗰下真係嚇咗我一跳！原來有個婆婆侍應想叫個客過嚟坐我呢張枱, 搭枱. 畀佢嚇完之後真係堅係有少少嬲嬲哋！！ 果位男士都見到餐廳最後有張二人枱, 佢就坐咗過去.

之後我真係越諗越嬲, 拍枱呢個動作勁騎呢！！講真仲要拍得唔係細聲唔係細力！我叫嗰個婆婆侍應過嚟話畀佢聽, 佢就嬉皮笑臉咁話：佢拍得大力咗喎. 講真我真係從來冇見過侍應要客過嚟坐呢個位要拍張枱囉, 通常都係指下個位或者摸一摸張凳示意. 依家我諗返呢個舉動可能係不滿我自己一個人坐咗張四人枱？！

有段小插曲有人厚多士 - 之後我就拍張枱幾下, 因為對於呢個舉動我真係拗曬頭？！跟住喺我後面傳嚟一個阿叔嘅聲：做乜拍枱呀？！原來坐我後面有個阿叔食客, 我解釋畀佢聽個婆婆侍應咁樣做, 佢嗰下又話：哦, 咁就唔啱啦..咁. 之後又串我話食嗰幾廿蚊係咁上下啦等等之類呢啲說話, 我問佢：咁呢個唔答案你滿唔滿意呀先生！？佢就即刻戴頭盔：你唔使同我交代喎. 我答佢：咁你問我做乜拍檯呀嘛咁我咪回應你囉, 即係無啦啦唔會拍枱, 唔通白卡咩！？跟住佢收咗皮..
呢啲寫字樓阿叔係咪好寂寞要搵人拗水吹呢, 咁多事嘅？！

仲有一樣嘢好奇怪, 我差唔多食到七七八八, 另一個婆婆侍應就走嚟開個櫃桶加添食具, 依家諗返佢好似淨係去咗我嗰張枱去做呢個動作, 同埋好似有去另一張枱, 好似唔係張張枱都有去加添食具. 呢個舉動我而家諗返, 都係啲騷擾行為, 應該都係不滿我自己走去坐咗張4人枱, 所以係都要做啲嘢滋擾我！！

由我入餐廳到我離開前後大約半個鐘, 呢啲小人做埋啲咁樣嘅動作去騷擾一個顧客, 都幾匪夷所思！！

我睇返呢間餐廳嘅其他食評, 好多都係批評佢哋嘅服務好恐怖, 原來佢哋早有前科！！香港飲食業越嚟越退步, 其中一個失敗原因大概就係請埋呢啲咁嘅質素嘅員工！！因為個客“唔聽話”, 所以就不斷做啲小動作去騷擾個客, 好似去懲罰佢咁！！我估我唔係唯一一個, 佢哋應該好熟練地, 一貫地, 用呢一啲滋擾性嘅動作去報復啲“唔聽話”的客人！！

以上所講嘅嘢句句屬實冇誇張冇失實, 歡迎餐廳老闆睇返9月26日下午兩點半至三點呢個時段嘅cctv, 我亦唔介意親身再和呢間餐廳嘅老闆對質. 我希望他朝有一日我再幫襯呢間餐廳嘅時候, 啲劣質員工已經不在！！！