鶴崎居酒屋 (已結業)

男朋友話佢見到Office附近開咗間新嘅日式居酒屋，於是上星期五放工之後我哋就去咗試吓。呢間居酒屋喺宏利金融中心，裝修都幾有特色。我特別鍾意佢哋個鼓同埋掛住嘅紙傘，為舖頭增加唔少氣氛。首先值得一讚係佢哋個Menu，選擇非常之多。由刺身到炸物，串燒到壽喜燒，真係基本上想食咩都得。我哋首先叫左安鱇魚肝同味醂魚乾。一冷一熱，一較一硬，非常不錯😋跟住我哋叫咗個北海刺身丼，呢個真係令我哋非常驚喜。$118有海膽、吞拿魚茸、帆立貝、三文魚子、油甘魚、蟹鉗同赤身，而且每樣食材都非常新鮮，分量十足，淨係呢個刺身丼都值得再嚟呢間居酒屋👍🏻我哋另外叫咗吉列廣島蠔同銀雪魚西京燒。銀雪魚西京燒我哋兩個爭住食，因為真係好好味😂 總括而言，呢間居酒屋係我哋兩個絕對會再光顧嘅餐廳！