果子｜海南雞飯·喇沙摻摻 (啟昌樓) (已結業)

今日難得踩完單車，晚餐就係大埔附近搵食，汀角路呢頭夜晚餐廳真係超級多選擇，七點後仲好死多人要排隊，所以今次我地六點就食，揀左呢間專食星馬菜既餐廳。見餐牌介紹呢個新加坡既軟殼蟹火山包好吸引，同點左個二人餐198。個咖喱麵包軟殼蟹上碟大大份，個麵包多士好香脆，沾上咖喱汁，十分惹味。軟殼蟹大大舊，外脆內軟，掛汁度一流！二人餐都好抵食，有兩份泰式小食，要左鳳爪同泰式魚餅，菜有一份要左馬拉盞炒通菜。主食再選兩款，要左香茅豬扒併雞翼椰醬飯，呢個較特別，係藍色既飯，原來係由蝶豆花整成的，充滿馬拉特色，有花生、乾魚仔同辣醬做配料。另一款叫左海鮮喇沙摻摻，即係會有米粉同油麵做麵底，份量超大碗，岩哂大胃王，配料有大蝦、蜆同豆卜，超足料。飲品要左檸檬薏米同紅豆薏米水，兩款都好清新解渴、消暑一流！