新麻蒲 BBQ (已結業)

今日中午我們行過旺角銀行中心，喺諗緊午餐想食咩嗰陣，見到有間「新麻蒲BBQ」嘅韓式燒烤店，所以我們就決定入去食午飯！啱啱坐低店員就攞咗啲餐前小菜畀我們，分別係明太子、泡菜同昆布，而且食完可以再叫！之後店員同我們推介話：「午市套餐有買三送一優惠！」我們叫咗鮑魚蔘鷄湯嘅鮑魚係原隻連殼上，肉質好爽甜彈牙，而且都幾大隻，湯底嘅味道好鮮味，而且有淡淡嘅蔘香味，由於經過長時間嘅烹煮，所以鷄肉嘅肉質極之鬆化，甚至連鷄骨都可以輕易咬碎食埋，真係超正呀！燉牛排骨嘅肉質超鬆軟嫩滑，完全唔會有韌或「嚡」嘅感覺，而且份量十足，湯底嘅味道非常鮮甜濃郁，用嚟撈白飯食，真係好正呀！新麻蒲部隊鍋就不過不失！海鮮嫩豆腐鍋嘅湯底味道好鮮味，但唔會好辣，材料有蝦、蜆同超滑溜嘅豆腐，亦都係用嚟拌飯一流呀！跟餐特飲：藍天檸檬汽水、覆盆子紅醋汽水、酸梅汽水同韓式柚子熱茶，當中我們覺得比較好飲嘅係藍天檸檬汽水，因酸嘅味道較為突出，感覺好醒胃，而其他就嘅味道就比較淡！