香港達人 (卓爾廣場) (已結業)

由於今晚我們約咗人客見面嘅時間比較夜，所以我們就喺屯門卓爾廣場嘅「香港達人」食咗晚飯先！我們叫咗三款唔同嘅魚，分別係涼瓜燜䱽魚、梅菜蒸鯇魚同豉汁蒸䱽魚！另外再叫咗隻薑蔥霸王鷄！涼瓜燜䱽魚嘅䱽魚煎得好色澤好金黃，而且邊邊嘅位置相當香口脆身，肉質好結實彈牙，而涼瓜亦好爽脆，唔會炒到過晒火而變到過腍，至於醬汁嘅味道就非常惹味，兼唔會過鹹，用嚟撈飯食真係一流呀！而梅菜蒸鯇魚同豉汁蒸䱽魚蒸嘅時間火候控制得啱啱好，所以肉質超鮮甜嫩滑！薑蔥霸王鷄係我們最重點讚賞㗎，因早兩日我們食咗隻畀人「偷工減料」兼唔足料嘅鷄，所以我們今日特意要叫隻鷄嚟食，一上碟嗰陣我們已經覺得好讚，因隻鷄超級肥美大隻，肉質極之鬆軟嫩滑，就算係鷄胸嘅位置都唔會有「嚡」嘅感覺，真係要講返句：「呢隻先係真正足料嘅鷄呀！」