椒椒相見 (興發街) (已結業)

不嬲我都好鍾意食辣嘢，聽朋友講天后有間裝修好靚嘅川菜館，咁今日就約埋班朋友一齊嚟試吓啦。一去到門口，已經見到好大幅壁畫，用少少傳統嘅裝修加埋創新嘅壁畫，估唔到又幾夾喎。入到去發現佢嘅裝修都係比較偏古風，其實都幾適合影相。一坐低佢就俾咗個小食我哋，原來係辣嘅蓮藕。因為我唔食蓮藕所以無試到，但係我朋友試咗就話好辣好開胃。前菜我哋叫咗一個棒棒雞，本身以為剩係得啲雞絲，估唔到仲有粉皮。呢個食落係唔辣嘅，佢撈左花生醬，同埋凍食所以好開胃。次次去食辣嘢我都必定要叫辣子雞，因為非常好送飯。但係呢道菜其實有啲難整，好少食到整得好食嘅。估唔到呢度整得好好食，啲雞炸得好脆但係又夠辣，細細粒咁好適合送飯。我哋仲叫咗個香辣干鍋，佢係可以自己揀唔同嘅餸放埋一個鍋度。我揀咗爆辣，估唔到真係好夠辣呀。香港好多川菜館都唔夠辣，終於搵到一間係食落會出汗㗎啦。而且個干鍋一啲都唔馬虎，入面每道餸都好足料，幾個人食都食唔晒呀。呢間川菜館好適合真係食辣嘅人，或者一大班朋友聚餐，我下次都一定會再嚟食過啊。