平時已經好少食印度野，亦都好少食素，今次真係第一次食印度素菜，感覺好新鮮！今餐最主要都係食個印度餅，再加啲醬點嚟食，而且主要食材都係用扁豆，感覺健康啲。
見到佢有一啲印度套餐，不過同朋友兩個人食，驚食唔晒，所以叫咗其他！
呢個係印度班戟，我揀咗番茄洋蔥味，感覺會香口啲。呢啲班戟會跟三種酸辣醬，同埋一個辣豆湯，
但係其實嗰醬同啲湯都唔係辣嘅，反而食到啲豆味，尤其是個湯，飲落係傑身啲，好似豆蓉咁！
另外緊係要試下印度咖哩，揀咗咖哩芝士，呢個咖哩係有啲洋蔥同印度香料嘅味，再加茅屋芝士，我以為印度咖喱會好辣，但原來係好似一個汁咁，點番個naan食真係好夾！
最後仲叫咗個masala tea,佢好似奶茶咁，不過有啲香料味同埋有陣薑味，幾特別！
