大班麵包西餅 (已結業)

今早我們要去西環做嘢，本來諗著做完嘢之後先食中午餐，但行過旺角快富街嘅「大班麵包西餅」見到新鮮熱辣出爐嘅麵包，就忍唔住要買嚟食！我們買咗媽咪最鍾意嘅合桃提子菠蘿包，面層嘅菠蘿皮非常香甜酥脆，另外仲有啲瓜子舖面，提子包嘅包質相當香甜軟熟，而且提子乾嘅份量亦都幾多，差唔多每一啖都可以食到香甜嘅提子乾，真係超正呀！白汁鷄丹麥包嘅鷄肉肉質都幾軟滑，但醬汁同沙律醬嘅份量比較多，所以感覺比較膩！玉桃蘋果玫瑰花包嘅外層係麵包，內層係用香甜蘋果肉圍著，而中間亦都係麵包，砌成好似一朵玫瑰花咁，令到賣相精緻吸引，真係好有特色！