川粵小食 (已搬遷) 新店位置

自從上次食過呢度嘅干鍋後，一直都對佢念念不忘，今日難得黎開柴灣，就梗係要再黎啦。原本想再食干鍋，但老闆話新出咗雞煲，問我有冇興趣試，咁就不如試下新菜式啦。呢度嘅雞煲同出面嘅雞煲唔同，老闆會先煮好所有餸，再放入鍋度用火慢慢座住，咁就唔駛驚食食下會凍晒啦。雞煲可以揀半隻或一隻雞，再加干鍋嘅配料，我地兩個人叫咗半隻雞，再加墨魚丸，雞脾菇及豬頸肉，辣度要中辣。上檯時香氣十足，雞煲非常惹味，因為配飯嘅關係，中辣都唔會覺得好辣，雞件醃得入味，雞肉亦好嫩滑，配料除咗我地揀嘅之外，仲有蓮藕萵筍等等，吸收晒煲入面嘅辣汁，真係好好味。總括黎講，呢間小店面積雖然細，但所做嘅川菜非常惹味，如果再黎柴灣，一定會再黎食。