影片
更多
2011-11-04
664 瀏覽
「阿一鮑魚」個朵聽就聽得多啦，不過XO咁大個仔都未有機會踏入富臨飯店半步，皆因小弟仍然未做倒富豪，每日重喺度埋頭苦幹緊！可能人品好啦，小肥真係好有口福架，今次機緣巧合地被邀請到黎富臨食好野，萬分感激！想話自己唔係大鄉里都唔得呀，多得uncle提點先知「阿一鮑魚」o既富臨只此一家，英文名為Forum！以前成日以為坊間其他富臨X，富臨Y全部都係跟「阿一」同集團，原來純粹係誤會；大家睇下佢地個英文名就明架啦。富臨共三層，冇電梯，只有貨「車立」同樓梯，似乎唔係好歡迎年紀大，行動唔方便，或太好酒o既客人。貴賓房光猛闊落舒適，冷氣電視可以自己調校；雖然咁老字號，但係飯店內絕對冇舊式中餐廳陣「叔」味，桌上o既餐具亦見光鮮，更每人一雙公筷，非常衛生。當晚派對安排喺三樓房間內，自己冇乜留意散枱既舖排，唯一係好意外地聽倒原來地下嗰層係冇洗手間o既。房內o既幾位服務生年紀雖則唔輕，不過衣著整齊，態度友善。佢地好有文化地為各位賓客以不同酒杯斟上靚酒，當晚超強VIP宴正式開始。 官燕焗釀蟹蓋：爸爸平時好驚食蟹蓋，因為怕溜，食完會滯到食唔落其他餸；嘩，今次都係第一次聽佢大讚蟹蓋好食！「阿一釀蟹蓋」精彩在於：一，用
想話自己唔係大鄉里都唔得呀，多得uncle提點先知「阿一鮑魚」o既富臨只此一家，英文名為Forum！以前成日以為坊間其他富臨X，富臨Y全部都係跟「阿一」同集團，原來純粹係誤會；大家睇下佢地個英文名就明架啦。
富臨共三層，冇電梯，只有貨「車立」同樓梯，似乎唔係好歡迎年紀大，行動唔方便，或太好酒o既客人。貴賓房光猛闊落舒適，冷氣電視可以自己調校；雖然咁老字號，但係飯店內絕對冇舊式中餐廳陣「叔」味，桌上o既餐具亦見光鮮，更每人一雙公筷，非常衛生。當晚派對安排喺三樓房間內，自己冇乜留意散枱既舖排，唯一係好意外地聽倒原來地下嗰層係冇洗手間o既。
房內o既幾位服務生年紀雖則唔輕，不過衣著整齊，態度友善。佢地好有文化地為各位賓客以不同酒杯斟上靚酒，當晚超強VIP宴正式開始。
官燕焗釀蟹蓋：爸爸平時好驚食蟹蓋，因為怕溜，食完會滯到食唔落其他餸；嘩，今次都係第一次聽佢大讚蟹蓋好食！「阿一釀蟹蓋」精彩在於：一，用官燕釀唔會好似平時嗰Ｄ濃味o既洋蔥豬肉咁搶走蟹肉本身o既鮮甜味，而且口感更覺幼嫩；二，師傅用薄薄o既蛋層包住黎焗，並不需要多餘o既芝士或芡汁，保持清而不溜，濕而不滯，有創意得黎整體非常細緻。
阿一鮑汁煎鵝肝：XO家中其中一個別號係「鵝肝狂」，因為多年前曾經喺泰國食brunch buffet中戀上鵝肝，一口氣食左九件即叫即煎o既中型鵝肝扒，創下家中紀錄！小弟食鵝肝機會唔多，所以每一次都會好珍惜地慢慢細嚐，更會記下令XO印象深刻嗰Ｄ！今次「阿一鵝肝」簡直令我神魂顛倒，可以話係有史以來食過最好食o既鵝肝！鵝肝滑溜非常，入口香軟，且毫不油膩，連底層嗰塊麵包都冇得彈，中國代表真係一Ｄ都唔失禮呀！為食既小肥好唔客氣地食左兩件添！據說當晚食倒o既「阿一鵝肝」餐牌上係冇o既，不過因為實在係太好味啦，不得不同大家分享，所以希望師傅可以考慮將依道餸列入餐牌上。
蟹皇紅燒翅：小肥同爸爸大肥有個癖好，就係食濃味o既翅時鍾意加返幾滴白蘭地，增添一陣香味o既同時，亦可帶出食材o既鮮甜味；哈，主人家提起時先知原來大家係同道中人，雙肥又賺左pat白蘭地！蟹皇紅燒翅好足料，翅身粗，芡湯濃得黎又唔會奪走蟹皇個甜味，加埋香醇o既白蘭地，簡直係頂瓜瓜！
花膠扣鵝掌：大大隻o既鵝掌同厚厚o既花膠同樣腍滑入味，拌碟o既豆苗都好甜好嫩。本身對海味認識唔深，所以聽倒我地碟上o既花膠為三頭半o既時候都拗左兩下頭；經理講解後先明白花膠頭數同鮑魚一樣，一斤返黎有幾多塊就等於個塊花膠係幾多頭。
阿一生煎東星斑：蒸魚就食得多，食生煎東星斑都係第一次。上碟時真係唔知東星斑係原條煎o既！魚肉鮮甜香滑，魚皮奇脆無比，豉油皇o既點綴更增添濕潤感，唯一o既問題係魚喺出面分哂先上枱，所以唔係好夠熱。
阿一鮑魚：鮑魚一上枱，第一個感覺係，鮑魚煮完連同色澤都可以回復返煮前o既容貌，「阿一鮑魚」果然名不虛傳！Uncle介紹三種食法：第一口，無添加地原隻食，好有「趙」頭，味道雖然比較淡，但係好「鮑魚」；第二口，點豉油食，突出左陣鮮甜味；第三口，點鮑汁食，雖然好香同埋比較濕滑Ｄ，但係就冇點豉油食咁鮮；總結係點豉油最正！
原汁羊腩煲：羊腩煲得好夠腍滑，味道一Ｄ都唔蘇，羊肉非常甜美香濃，個汁校得恰到好處，廚功好細膩！好多人都話蘇味等同羊味，隻羊唔蘇不如唔好食；但小弟o既愚見係，羊味同蘇味其實好相似，分別就好似魚味同腥味咁只差一線，蘇味同腥味都欠缺左陣鮮味（哈，咁啱個「鮮」字就係由「魚」同「羊」兩字組成，真係橋，中國文字真係好有意思）！
羊腩汁撈生麵：生麵爽口入味，可以比個值口XO撈埋Ｄ羊腩汁，主人家真係諗得週到！
頂級普洱茶：喺黃毛小子XO心目中，中國人o既普洱茶就好比西人o既expresso，雙方外表同樣深色，而且兩者都具有消滯o既功效。當晚飯宴接近尾聲時，先知道原來主人家係一位品茗家。上甜品前，佢特意安排伙計沖製三輪私人真藏o既普洱茶比賓客享用。對茗茶冇乜研究o既小肥黎講，嗰杯普洱非常香甜細膩濃滑，絕對冇平時喺茶樓飲嗰Ｄ普洱咁嚡口或酸澀；連患有「普洱恐懼症」o既爸爸同飲親茶都失眠o既媽媽都各飲三杯，可想而知頂級普洱o既好味程度有幾爆燈！據說，普洱同酒一樣，都好講究年份，不過詳細說明有少少失聰o既XO就聽得唔係好清楚，所以冇辦法同大家分享。
美點雙輝之煎推：煎推大大粒，脹卜卜，炸得好乾身，望落一Ｄ都唔油膩！咬落皮薄香脆鬆軟，簡直係完美呀！唔係好食中式甜品o既XO居然要打孖黎，姨媽都驚嘆左句：「你唔係唔食煎推架咩？！」甜品必吃之選也！
美點雙輝之馬拉糕：籠蓋一打開，馬拉糕o既味道隨住蒸氣散發出黎，清香撲鼻！微甜o既馬拉糕好夠鬆軟，入左口都重可以感覺倒新鮮蒸出黎嗰陣熱氣，正呀！
超強VIP宴真係唔簡單，享用美酒佳餚o既同時，可以笑聽長輩們極具娛樂性o既對話，更有幸與名廚有一面之緣，小肥真係好有福！後記：因為唔好意思問埋單幾錢，當然亦不敢想像，所以抵食分無法公平定奪，敬請原諒。
張貼
