西門町台灣麵食 (已結業)

今日難得放假，諗住跟阿媽去屋企附近既西門町食台灣野。近2 點去到唔太多人，兩個人唔太肚餓，於是兩個人叫一個$39 飯加$24 小食，餐牌上寫明一個飯或麵同時叫一個小食，每個小食減$10。店內當眼地方有寫明每人最低消費$15，於是2 個人一個飯加一個小食$39+24-10=$53，已經達到最低消費。落單後，見阿姐寫$39+24，心想可能一時寫錯，於是査詢，阿姐話小食減左$10 唔夠$15最低消費，所以用正價計小食。於是我諗住改另一個$25 小食以夠$15，阿姐跟住又話兩個人叫一個飯，小食唔減得$10。即刻著曬火！第一，最低消費係你店自己訂，如果你要求客人最低消費係一個飯或麵或一個正價小食，可清楚列明以避免爭抝。第二，餐牌上寫明一個飯或麵加一個小食減$10，但無話兩個人叫一個飯或麵加小食唔減得，呢個係咩邏輯？如果店內優惠係有限制，唔該寫清楚或者落單個陣講明。明白飲食生意難做，有最低消費以保障生意額無可厚非，但當客人符合最低消費額時，又擺龍門以強加諸於客人單內，實在令人氣憤！Blacklist 此店！永不幫襯！