真味日本料理 (已結業)

喺荃灣搵食咁耐都唔知原來有間大件魚生既日本野！諗住食下小食飲下野，不過見到個個都叫壽司刺身咁鬼大件，忍唔住叫左黎食，三文腩賣曬，有三文魚、火灸三文魚、三文魚籽、甜蝦～超級澎湃！以為係刺身先會厚切，估唔到壽司塊魚生都咁大塊同咁厚！女仔真係要3啖先食到，基本上一放入口，一係淨係咬到魚生咬唔到飯，而魚生都唔錯～幾肥美都新鮮！每款壽司都唔錯～飯都有加量，真係要量力而為先好叫😂輪到串燒，雞軟骨燒得夠香脆，表皮金黃色脆卜卜，一客有兩串～仲有燒三文魚頭同牛油炒蜆，估唔到整得咁好食！三文魚頭好大個，入面好多肉好嫩，肉汁係咁流出黎～皮亦燒得甘香，有軟骨係入面幾好咬，食呢個都幾飽！牛油炒蜆係意想唔到咁好食～用鐵板上令到牛油香氣四溢～原來加左檸檬汁之後味道大大提升！有牛油香之餘仲覺得酸酸地好開胃！就咁食多幾件會覺得漏左D,所以建議加檸檬汁好食好多呀！每樣野都有水準，當然唔能夠同高級日本食店比較，但係燒既功架有返咁上下，魚生都唔錯，而且好抵食！雖然座位逼左D, 有時要等位，仲有～希望可以賣啤酒類同其他日本飲品例如果汁酒、果汁汽水，淨係得可樂雪碧，好想嗌支Asahi配燒三文魚頭呀！