燒蝦蝦 (興泰大廈) (已結業)

今日同朋友過咗嚟屯門呢邊食流水蝦放題，已經唔係第一次食！場內嘅佈置幾好，自助區喺中間，有幾款炸物熟食、糖水，飲品任飲，選擇真係勁多 連啤酒都有幾款，仲有清酒梅酒任飲，真係岩晒酒鬼。另外就係海鮮，超多款！最最最最最驚喜係鮑魚有任食🥰🥰😍第一次食流水哈放題係有鮑魚任食，另外我最鍾意食嘅蜆都有幾款，仲有蠔、青口，扇貝同埋幾款魚！另外仲有蔬菜區、丸、同埋肉類，見到都覺得滿足。首先每位都會送龍蝦，白鱔！個白鱔真係超正，燒完出嚟個皮好脆，肉質嫩彈，一串真係唔夠喉！食完唯有開始燒流水蝦同埋食海鮮！流水蝦勁生猛，好新鮮！總括來講所有食物質素都唔錯，可以食到咁多海鮮真係滿足晒了。最後留返少少胃食甜品，雖然甜品唔算得上好高質，但係有一兩款都係特別吸引，例如有朱古力糯米糍同埋brownie，出面雪糕櫃都有兩大個 基本上咩雪糕都有，總會搵到啱食，一啲都唔求其。