One More Hotpot 來一鍋 (已結業)

今日朋友帶我嚟到鵝頸橋附近呢一間新開嘅台式火鍋，呢度係半任食形式，368蚊一位。呢度係新開嘅，所有用具同埋地方都好乾淨！裝修亦都好新，除咗大堂卡座之外，仲設有貴賓廳，地方相當唔錯！一坐低， 指定食物就可以按人頭數量先上枱，份量已經好多，如果唔夠的話，仲有呢一啲配料可以任叫！吃到飽！前菜有木耳同拍青瓜。兩款都頗辣，但幾開胃。我哋選咗酸菜卜卜蜆鍋，鍋底有大量蜆！好甜！每一隻都開哂，肉都好大！酸菜份量也多得驚人！指定菜式之一係牛肩脊，肉味好濃，脂肪分布亦好均勻！肉好淋！另外一個主角亦都上枱，就係呢一盤海鮮！有鮑魚，大蜆，貴妃蚌，生蠔，大蝦，青口，大扇背。畫面好豐富好開心！海鮮好甜！尤其係蚌同埋大扇貝！又淋又甜！好鮮味！呢一個火鍋拼盤亦都係指定菜式！呢度嘅丸係手打嘅，好彈牙有口感！餃亦都係自家製，皮薄涵靚，我食過韭菜水餃同埋鮮蝦水餃，味道不俗但略嫌比較細隻。其實食完指定菜式我哋都已經好飽，不過又心思思想試吓其他嘢，所以就點左花膠同埋粟米，粟米超甜，花膠亦都比想像中大，花膠吸收左湯底嘅甜味亦都好甜好滑！最後就送來一份甜品，今晚嘅甜品係心太軟！心太軟唔太甜，有黑朱古力嘅味道！呢晚嘅打邊爐質素不錯！