日日香鵝肉飯店 (淘大商場2期) (已結業)

今日發現原來日日香鵝肉飯店都幾好食，佢嘅二人套餐都只係$228 ，有齊飯，燉湯，菜，鵝，小食，性價比頗高，加$8仲可以要埋凍熱嘢飲🥳🦢招牌鵝肉啖啖肉，滷水味唔會蓋過鵝肉嘅鮮嫩味道，肉質軟腍，點少少酸醋，越食越滋味。小食有鵝腎，豬大腸，豬耳，紅腸，豬手，豬腩肉比你揀，可以揀其中兩款。🐷份量都唔少，豬大腸滷得得入味，但食落又唔會太鹹，大腸仲黐住啲肥膏，食落好甘香😍豬手一啲都唔嚡又唔硬，皮帶有少少煙韌嘅口感，蘸上酸醋，好好食。燉湯🍵原盅奉上，好足料，有圓肉，烏雞，蟲草花，湯頭清澈唔油膩，飲落清甜，熱辣辣，好暖胃☺️🥬滷水汁生菜生菜爽脆鮮嫩，索晒滷水汁，好食😋原盅宗老火燉湯加$8仲可以有凍熱嘢飲🍋青檸梳打唔似坊間梳打水冇乜氣，青檸水和梳打係分開上，罐裝梳打，夠晒氣，飲落特別過癮，味道酸甜，感覺清新。🍊熱柑桔檸蜜消滯又解膩🤓