Castle Cafe (已結業)

由於工作關係，又唔太熟荔枝角，所以同同事求其搵咗間餐廳食飯。諗住近近地咩都試下先，點知咁容易就中伏。黑椒蒜香薯仔牛柳粒飯＄46米飯偏硬，唔係軟熟個種。自問對飯嘅要求都係正正常常就可以，但呢間嘅飯令我有種食緊小學飯盒嘅感覺，有濃濃嘅頹味。醬汁方面，黑椒味好濃，但濃烈得好死，唔係香個種，反而令人覺得太刺激。蒜香味就真係唔太食到，比黑椒味搶哂。薯仔係細細粒切法，都係普通貨色唔特別，亦食唔出薯香。牛柳粒唔香，牛肉味欠奉，好失望。由於呢個飯連正常都算唔上，實在好難食哂佢。呢個餐仲有包餐湯，但係全枱人嘅湯都係食完個飯後上，仲要我地醒起提店員先有得飲。呢類服務上我覺得亦有改善空間，店員工作態度感覺有點散漫。