阿爺粥品手工涮涮鍋 (已結業)

今晚一家人外出晚餐，途經荃灣見到呢間新開張既火鍋店望入去見到裝修都幾靚幾有特色，家人都話可以試吓，於是就入去啦，服務員好有禮貌引領我哋安排坐位，跟住當然係揀嘢食啦，我哋揀咗個粥底仲有半隻文昌雞，先頭家人話半隻雞要百多元會唔會貴咗D，但食過之後大家都話物有所值，點解呢……因為係新鮮雞黎架（外出食嘢真係唔係咁多地方有新鮮雞食的）其他火鍋配料都真係幾好喎，阿爸至愛既粉腸，洗得好乾淨完全冇異味好新鮮又夠淋唔會好似食橡膠咁！呢個自家制雲吞成個乒乓波咁大粒，味道調配得唔錯幾好食九肚魚一睇就知非常新鮮又夠大條，食落好鮮好甜，食完火鍋配料D汁落哂粥底度，D粥果然夠哂鮮甜，美中不足係如果粥底稍稍多DD米會口感更好，見到餐牌有D小食所以又試吓唔試過都唔知原來火鍋店除咗火鍋及配料好之外，原來廚房嘢一樣可以幾惦吓，由以呢個干煸四季豆真係非常靠得住，炒得好有鑊氣而味道好香好好味！仲有個煎焗魚咀，焗得香之餘又唔會乾哂飲埋呢杯透心涼既茘枝忌廉沙冰就滿足哂！