營豐海南雞專門店 (已結業)

西灣河本身已經好多嘢食，而家又多一個選擇。今次見到呢一間營豐海南雞係間外賣店，除咗多款切雞之外，仲有賣唔同嘅飯盒，例如豬扒同雞扒。第一次幫襯，所以點咗佢哋嘅招牌菜 -- 脫骨海南雞飯。飯方面可以揀油飯或者白飯。油飯好香，份量亦都足夠。脫骨海南雞啖啖肉 食落更加方便。呢度似乎係走泰式海南雞風格，醬汁同我食開嘅唔同，感覺冇咁傳統，但比較清新。海南雞唔係配黑鼓油而係配泰式甜酸醋，雞肉亦好入味。仲有唔少酸蘿蔔，食落開胃解膩。呢度仲有唔少小食可以買，例如金沙骨、滷水牛筋、泰式豬手...... 今次加咗一塊15蚊嘅香茅豬扒，香茅味唔係好濃郁，但整體上都夠味。配埋例湯或者汽水，$30-40呢個價錢都算合理。