Will's Coffee (已結業)

深水埗cafe越開越多，完全食唔切，呢日就趁住lunch break去咗Will's Coffee。小店果然迷你，一眼睇晒，入面係開放式廚房，兩邊各有兩個座位，一邊可以堂食，另一邊則俾客人等外賣或者坐低飲杯咖啡。原先我都諗住嚟買外賣，但可能我去嘅時間尚早，人流未算多，索性坐低慢慢食。店舖雖小，五臟俱全。除咗咖啡之外，亦提供唔同類型嘅輕食，包括：牛角包、意粉、貝果、貝果漢堡，甚至西多士都有，啱晒想輕食嘅我！店內裝潢溫馨走文青風格，睇得出店主花咗唔少心機。我揀咗韓式辣醬泡菜五花腩貝果漢堡，而貝果都會有4款選擇，每款都好吸引。我揀嘅呢個Poppy Seed Sesame bagel口感紮實飽滿，食落煙靭又有彈性，加上貝果表面嘅粒粒罌粟籽增添口感，包體實在唔錯。入面夾住五花腩片及韓式泡菜，味道意想不到地配合，加埋新鮮生菜，味道惹味清新，完全唔膩！咖啡點咗一杯Mocha（大），咖啡拉花漂亮，不過咖啡味就唔夠濃郁，反而被朱古力味蓋過，有改善空間。