陸陸雞煲火鍋 (已結業)

落雨天嘅晚上去到旺角食雞煲同打邊爐，一樣坐無虛席，全因呢度美食夠滋味! 兩人火鍋太餐之前，先有呢個陸陸雞煲，上枱時香氣撲鼻，嫩滑嘅雞件加上微辣嘅味道，以及香蔥蒜頭等配料，當然夠晒惹味，正正係大家最佳開胃前菜。接著嚟到嘅火鍋，有原隻龍蝦做湯底，先嚐一口龍蝦湯，鮮甜味濃，龍蝦蝦膏亦豐滿，相信無人可以抵抗到呢種美味誘惑。而海鮮拼盤當然亦吸引: 有貴妃蚌、鮑魚、蟶子、帶子等等，夠晒豪華。而且款款海鮮都夠晒新鮮，充滿質感嘅鮑魚，彈牙口感令人難忘; 蟶子、貴妃蚌等貝殼類海產亦無雜質，入口滿滿鮮甜海鮮味道!而食肉方面亦無令人失望，牛肩胛片亦滿滿香濃牛肉味道，入口極之嫩滑; 而豬肉片亦選料新鮮，帶有豬肉嘅爽勁口感! 而各款肉丸亦值得推介，手打蝦丸、墨丸都有令人滿足嘅彈牙口感，加上足料嘅餡料，令人食得滿足!