迦南咖啡 (已結業)

今朝諗住去Beanstalk食個早餐，睇下轉手前同轉手後有無大分別，點知一早去到係拉左閘。唯有又再繼續我的中上環咖啡之旅，記得這裡轉左手之後都未試過，就來試一試。呢度朝早全男班運作，同以前Beanstalk的全女班剛好相反。朝早八時許，店內都有客人在食緊野，門外仲大大架CS車牌的座駕，唔知佢在那裡食早餐？早餐餐牌由A至I，選擇都不少，今朝想吃多一點，就叫了比較豐富的A餐，有紅糙米麥皮、火腿煎雙蛋及蒜蓉香草多士，咖啡就加了3蚊要了即磨的house coffee。本身由細到大都不太喜歡麥皮，不過見佢係紅糙米，好似好健康咁，就叫來試試。內裡粒粒煲開了的糙米，少許甜，又不是太難吃，應是吃粥以外的早餐健康選擇；火腿煎蛋是例牌水準，蒜蓉香草多士幾好味，熱辣辣，蒜蓉味強烈，陣味在口內成朝唔散；熱咖啡不錯，味道均衡，但比起之前的Beanstalk咖啡還是不夠香濃，如果可以做濃一點就更醒神，不過已經比其他地方好。埋單23蚊，吃得飽飽，都吃得過。幾位男店員好有禮貌，唔該前多謝後的，服務都幾好。