壽司豐 (已結業)

最近成日都想食壽司，但係疫情下又唔岩去太多人嘅餐廳食野，係朋友嘅推薦之下就去左呢間位於尖沙咀嘅豐壽司食omakase 。今次我就試左最貴（$1280）嘅set ，分別有前菜，6款刺身，1款熟食，3款壽司，湯同甜品。前菜係比較常見嘅枝豆 。第一款刺身係廣島蠔，上面配左海膽，三文魚子同吞拿魚蓉，非常之鮮甜。之後就係慢煮南非鮑魚，經過6個鐘嘅慢煮後，鮑魚變得非常淰，但鮮美依舊。之後就係我最愛嘅拖羅刺身，今次呢款係大拖羅，拖羅食落有少少嘅煙燻香，入口即溶，相當好食。之後三款時令刺身分別係鱸魚配高糖度日本蕃茄，瑩光魷魚同埋金目鯛。當中比較特別嘅係螢光魷魚，據師傅所講，螢光魷魚係代表春天嘅來臨，每年只有春冬交接嘅時間食到，味道鮮美。之後嘅熟食就係燒油甘魚鮫，師傅將油甘魚鮫外層燒到脆卟卟，而入面就剛好熟，食落味道相當唔錯。3款壽司分別係赤身， 煙燻拖羅同海膽，當中我最鍾意嘅係海膽，食落非常清甜。鯛魚湯亦非常鮮美，飲落有濃郁嘅魚香。最後有個日本赤蜜瓜做甜品，為呢一餐豐富嘅晚餐畫上完美嘅句號。