呢度專門做婚宴，所以裝修一流，達酒店級數，影相打卡超正。
晚市餐牌有海鮮，燒味，小菜，小食，湯羹，甜品等等。茶芥每人$15，餐前小食$20。
1
今晚叫左幾款招牌菜同同行友人分享。
招牌白胡椒蟹 $468 另加一
見到呢個招牌菜招牌白胡椒蟹，咁啱呢排d蟹又當造，即刻叫黎試下先。好快就食得啦，餐牌寫明每隻蟹約斤半，成隻巨蟹用鐵板上，蟹未到聲先到，上枱後，經理將d汁㨆上面，香氣四溢，烽煙四起！隻蟹好多肉，肉質鮮甜多汁，蟹殼都超脆，食得出係新鮮，蟹膏都有。白胡椒汁香而唔過辣，唔會完全蓋過蟹味，味道啱啱好。d洋蔥片吸左d汁都好味。服務員提供左每人一對膠手套同濕紙巾，夠哂貼心。
紅燒煲仔翅 $188一煲 另加一
1
好耐冇食翅，見到紅燒煲仔翅價錢唔算貴，今晚就豪一豪，一人一煲。服務員原來係你面前將兩煲煲仔翅加熱到滾哂先上枱，好震撼! 排翅果然好多，足有四大排，下面墊左好多爽口芽菜。
個湯好清，醋同胡椒粉另上，等你自行調味。
鮮菠蘿脆皮咕嚕肉 $148 另加一
呢個小菜又係另一招牌，首先鮮菠蘿脆皮咕嚕肉賣相好靚，鮮菠蘿一大條切好哂一舊舊方便食用，香甜多汁。脆皮咕嚕肉大概有十幾舊左右，真係做到脆皮，入面嘅豬肉腍得黎又唔過肥，個汁酸酸甜甜，正! 其他配料仲有洋蔥，甜椒同辣椒。
蒜茸炒白菜仔 $108 另加一
蒜茸炒白菜仔炒得幾好，d菜葉仲係翠綠，唔太油得黎d蒜茸味又香。
我地清哂所有餸，大大滿足又唔過滯。總括而言，食物質素幾好，而座位舒適，服務快捷，呢餐食得好舒服。期待下次再黎譽宴！
